Atkvæðagreiðsla utan kjörfundar er hafin

Kosið verður um sameiningu Langanesbyggðar og Svalbarðshrepps laugardaginn 26. mars næstkomandi. Atkvæðagreiðsla utan kjörfundar vegna kosningarinnar er hafin hjá sýslumönnum og má greiða atkvæði á skrifstofum sýslumanna á auglýstum afgreiðslutíma á hverjum stað fram að kjördegi. Þeim sem greiða ætla atkvæði ber að framvísa skilríkjum.

Atkvæðagreiðslan fer þannig fram að kjósandi stimplar eða ritar á kjörseðil orðið ,,já" ef hann er hlynntur tillögu um sameiningu sveitarfélaganna en ,,nei" ef hann er mótfallinn tillögunni.

Tekið skal fram að samkvæmt lögum nr. 137/2021  um breytingu á kosningalögum nr. 112/2021 (atkvæðagreiðslur meðal íbúa sveitarfélaga), sem tóku gildi 30. desember sl. segir að um framkvæmd atkvæðagreiðslna meðal íbúa sveitarfélaga á grundvelli 38. gr., 107. gr. og 119. gr. sveitarstjórnarlaga fari eftir lögum um kosningar til sveitarstjórna, nr. 5/1998, og lögum um kosningar til Alþingis, nr. 24/2000, eftir því sem við getur átt.

Kjósendur athugið, að skrifstofa fulltrúa sýslumanns á Þórshöfn verður lokuð til 10. mars. Þangað til geta þeir sem gera ekki ráð fyrir að vera heima á kördag kosið hjá hvaða embætti sýslumanns sem er.